Posted on: November 17th, 2019
Akizungumza wakati wa uzinduzi wa wa Kampeni ya kuzuia na kudhibiti magonjwa yasiyoambukizwa, Mkuu wa Wilaya ya Tabora Komanya Kitwala ambae ndiye alikuwa mgeni rasmi kwenye kilele hicho cha wiki ya maadhimisho, aliwataka wakazi wa Manispaa na Mkoa wa Tabora kwa ujumla kujenga tabia ya kuchunguza afya zao mapema walau mara mbili kwa mwaka.
Alisema hatua hiyo itasaidia kugundua matatizo mapema na kuwahi kukabiliana nalo likiwa bado katika hatua za awali kwa kutumia gharama kidogo.
Kitwala aliongeza kuwa suluhisho jingine ambalo halihitaji gharama kubwa kukabiliana na tatizo hilo ni pamoja na wakazi wa Tabora kubadili mfumo wa maisha juu ya ulaji wa vyakula na kushiriki mazoezi.
Kwa upande wake Katibu Tawala Msaidizi (Afya) Dkt. Honoratha Rutatinisibwa alisema kuwa toka mwaka 2017 hadi 2019 kumekuwepo na ongezeko la magonjwa hayo Mkoani Tabora
Baadhi ya magonjwa yasiyoambukizwa ni kisukari, shinikizo la damu, seli mundu, saratani , magonjwa ya akili na pumu.
Alitaja baadhi ya wagonjwa wa magonjwa yasioambukizwa waliongeza kuwa ni kisukari ambapo mwaka 2017 walikuwa 4,345 na kuongezaka hadi kufikia 6,732 mwaka 2019 ikiwa ni ongezeko la wagonjwa 2,387 sawa na asilimia 35.
Dkt. Rutatinisibwa alisema kwa upande wa Shikizo la Damu, wagonjwa wameongezeka katika kipindi hicho hicho kutoka 13,940 hadi kufikia 19,460 ikiwa ni ongezeko wagonjwa 5,520 sawa na asilimia 28.
Aliongeza kuwa upande wa ugonjwa wa pumu umeongezeka kutoka wagonjwa 5,338 hadi kufikia wagonjwa 8,434 ikiwa kuna ongezeko la wagonjwa 3,096 sawa na asilimia 37 ndani ya kipindi hicho hicho.
