Posted on: June 12th, 2023
Na Alex Siriyako:
Dkt. Peter M. Nyanja aliyekuwa Mkurugenzi wa Manispaa ya Tabora kabla ya mabadiliko ya uhamisho na uteuzi yaliyofanywa na Mhe. Rais wa Jamhuri ya Muungano wa Tanzania Mhe.Dkt. Samia Suluhu Hassan hivi karbuni ambapo Dkt. Nyanja amebadilishwa kituo na kwenda Halmashauri ya Wilaya ya Muleba Mkoani Kagera na Ndugu Elias M. Kayandabila akaletwa Manispaa ya Tabora akitokea Halmashauri ya Muleba, amekabidhi Ofisi ya Mkurugenzi wa Manispaa ya Tabora leo juni 12, 2023.
Katika kikao rasmi cha makabidhiano, Dkt. Nyanja amewashukuru Wakuu wa Sehemu na Divisheni kwa ushirikiano mkubwa ambao wamempa wakati wote aliokuwa hapa Manispaa ya Tabora na kuwaomba wampe ushirikiano huo huo ikiwezekana zaidi ya hapo kwa Ndugu Kayandabila.
Ndugu Elias M. Kayandabila, ambae ndio Mkurugenzi mpya wa Manispaa ya Tabora, ameshukuru sana Wakuu wa Divisheni na Sehemu kwa kumkaribisha vyema sana kufanya kazi katika Manispaa hii, ameomba ushirikiano wa dhati sana, ambao kila mmoja atajitambua kwenye nafas yake ipasavyo, na kuongeza kuwa atashirikiana sana na kila mmoja wa wakuu wa Vitengo kuhakikisha kuwa Manispaa ya Tabora inafikia malengo yake iliyojiwekea kwa asilimia mia moja.
Nae Mstahiki Meya wa Manispaa ya Tabora Mhe. Ramadhan Kapela akishuhudia makabidhiano hayo, amemkaribisha sana Ndugu Kayandabila katika Manispaa yake na ameahidi kwa kushirikiana na Baraza la Madiwani kumpa ushirikiano mkubwa sana Mkurugenzi mpya ilmradi tu Manispaa ya Tabora iweze kutimiza malengo yake makubwa iliyojiwekea.
Bi. Happy Mtutwa kwa niaba ya watumishi wengine amemshukuru Mkurugenzi anaeondoka kwa jinsi alivyowaunganisha watumishi wa Manispaa ya Tabora kuwa kitu kimoja, lakini pia ameahidi kuwa kama Watumishi wa Maispaa kwa umoja wao watampa ushirikiano mkubwa sana Mkurugenzi mpya na hawatomuangusha.
